Estructura de la base de datos

Nesta BD atópense los datos relativos a 20 informantes escoyíos ente tolos analizaos nel proyectu AMPER-Astur y representativos de toles variables controlaes. Ufiértense 252 archivos sonoros de caún de los 20 informantes, de los que 126 son les muestres de fala real y otres tantes correspuenden al soníu resintetizáu —desprovistu de soporte léxicu— de caúna d’elles. Esto fai un total 5040 archivos wav. Amás, xunto cola emisión sonora preséntase información gráfica de les curves d’entonación (F0) en Hz[1], lo mesmo que de la duración y intensidá de caúna de les vocales del enunciáu (en total 12600 gráficos).

Les variables que se tuvieron en cuenta son les siguientes:

Variedá llingüística

  • Asturianu / gallego-asturianu
  • Castellanu

Llugar

El grupu AMPER-Astur escoyó cinco puntos d’encuesta representativos de les cuatro árees dialectales tradicionalmente consideraes n’Asturies. Tamién s’añedió na zona central una subdivisión norte / sur debida al saltu entonativu destacáu que se da ente eses zones. Poro, encuestóse en cinco zones:

  • Área de gallego-asturianu: El Franco
  • Área d’asturianu occidental: Tinéu
  • Área d’asturianu central: Oviedo
  • Área d’asturianu centro-sureñu: Mieres
  • Área d’asturianu oriental: Ribeseya

Informantes

Los requisitos sociollingüísticos observaos en tolos informantes son los siguientes: homes y muyeres, ente 25 y 50 años, ensin estudios superiores, nacíos y residentes nel llugar de la encuesta. Total 20 informantes:

  • 10 muyeres
  • 10 homes

Cruciando esta variable coles anteriores, escoyimos pa esta DB a 20 nformantes, de los que, un home y una muyer en castellanu, y un home y una muyer n’asturianu en cada puntu d’encuesta.

Modalidá oracional

Les muestres sonores puen oyese en modalidá asertiva o interrogativa y tán venceyaes a un gráficu de frecuencia (F0) que representa les tres realizaciones repitíes pol mesmu informante y la media de toes elles. Otra opción ye la comparanza de modalidaes asertiva y interrogativa— con accesu a los dos archivos sonoros y a tres gráficos comparativos, resultantes estos últimos de la media de tres realizaciones de cada muestra pol mesmu informante: ún de los gráficos compara les curves de frecuencia de los dos enunciaos, otru la duración de les vocales y, p’acabar, un gráficu cola intensidá de cada vocal de dambes modalidaes:

  • Asertiva
  • Interrogativa
  • Comparación asertiva / interrogativa

Estructura oracional

Siguiendo los protocolos del proyectu AMPER los enunciaos del corpus ad hoc qu’equí ufiertamos presenten la siguiente estructura:

  • Sin espansión: Suxetu+Verbu+Oxetu
  • Con espansión nel suxetu: S+Espansión+V+O
  • Con espansión nel oxetu: S+V+O+Espansión

La variación en caún de los enunciaos respuende a la tipoloxía acentual asturiana y castellana n’agudes, llanes y esdrúxules, mostrando toles combinaciones en caún de los constituyentes, sacante nel verbu que siempre ye llanu.

[1] Por  un erru, nel marxe izquierdu de  tolos gráficos comparativos de F0 ente asertiva y interrogativa figura “F0 [St]”, per contra, los valores tán calculaos en Hz en tolos casos.