Atles dialectométricu

Atles dialectométricu diferencial o de la Escuela Dialectométrica de Salzburgo [programa VDM]

Esti tipu d'atles xenérase por aciu del programa VDM (Visual DialectoMetry), desarrolláu na Universidá de Salzburgo (Austria) pol equipu del profesor Hans Goebl. Les consultes nesti casu consisten en verificar cuáles son les asemeyances y diferencies, en trazos llingüísticos, ente caún de los 40 puntos d'encuesta. Tales asemeyances y diferencies apaecen como valores estadísticos, depués de convertir los diversos trazos llingüísticos diferenciales en valores matemáticos. La representación cartográfica ye un mapa de polígonos o coropletu, onde los diversos valores de la escala d'asemeyanza / diferencia represéntase nuna gama de colores «caliente – frío». D'otra manera, el programa VDM ye a xenerar agrupaciones dialectales formaes por xerarquización de trazos diferenciales, tomando la forma d'un árbol xenealóxicu (dendrograma o árbol de Ward), d'au resulta una clasificación o agrupación dialectal obtenida por aciu de procedimientos matemático-estadísticos. Por mor de les característiques específiques del proyectu ETLEN, hai dos menes de midimientu y consulta dialectométrica:

  • Midimientu analíticu. La unidá de midida sobre la que se faen los taxaos ye caún de los ítems obteníos como respuestes nel Cuestionariu. Por exemplu, nel fenómenu «Conservación de les vocales /ε/ y /ɔ/ tóniques, frente a la so diptongación», compútense de manera independiente les respuestes a tĕrram, fĕrrum, uĕtŭlum, pĕtram, nĕptum, fĕstam, cŏrpus, pŏrtam, nŏuum, mŏrtuum, fŏlia y hŏrtum, teniendo en cuenta en caúna d'elles los taxaos (1) conservación de les vocales /ε/ y /ɔ/ y (2) diptongación de les vocales /ε/ y /ɔ/.
  • Midimientu sintéticu. La unidá de midida sobre la que se faen los taxaos ye'l fenómenu llingüísticu y non los ítems. Por exemplu, nel fenómenu «Conservación de les vocales /ε/ y /ɔ/ tóniques, frente a la so diptongación» nun se tienen en cuenta los ítems léxicos, y los taxaos son dos: conservación de les vocales /ε/ y /ɔ/ y diptongación de les vocales /ε/ y /ɔ/, ensin atender a ítem léxicu nengún.