Atles horiométricu

Atles horiométricu o dialectométricu de frontera [programa CartoDial]

Nesti atles, la unidá de consulta ye caún de los fenómenos del cuestionariu. Cada fenómenu contién trazos llingüísticos diferenciales con respuestes que permiten adscribise al dominiu gallego-portugués, al dominiu asturlleonés y, en bien pocos de casos, a la zona Eo-Navia, si'l fenómenu en cuestión ye únicu d'ella. Con cuenta d'evitar denominaciones de mena étnica, l'ETLEN valse de les espresiones dominiu occidental, dominiu oriental y zona axial, respectivamente. Asina, dau un fenómenu nun puntu d'encuesta determináu, a les sos respuestes asígnase-yos una taxonomía (o adscripción xeotipolóxica) d'acuerdu con esti esquema:

  • Occidental – Oriental [= fenómenu clasificáu como gallego-portugués]
  • – Occidental + Oriental [=fenómenu clasificáu como asturlleonés]
  • – Occidental – Oriental [=fenómenu clasificáu como axial]
  • + Occidental + Oriental [=fenómenu común a dambos dominios]

Nesti esquema asígnase una puntuación a cada ítem; la suma de tolos ítems tien que ser de 100 puntos. Por exemplu, el fenómenu «Conservación de les vocales /ε/ y /ɔ/ tóniques llatines nel léxicu patrimonial, frente a la so diptongación» tien como respuestes posibles na zona d'estudiu: la conservación de tales vocales (terra, pedra, porta, novo), frente a la so diptongación (tierra, piedra, puerta, nuevu ~ nuovu). La conservación clasifícase como trazu occidental, frente a la diptongación, que se clasifica como trazu oriental. Les respuestes obteníes n'El Pato (conceyu d'Eilao) son les del primer tipu; polo tanto, la puntuación ye como sigue:

  • + Occidental – Oriental: 10
  • – Occidental + Oriental: 0
  • – Occidental – Oriental: 0
  • + Occidental + Oriental: 0

Otru exemplu. L'enunciáu «Caltenimientu del hiatu -a’e- procedente de la perda d'una consonante intervocálica non nasal, frente a la so reducción y frente a la xeneración d'una consonante antihiática -y- nel casu del verbu caer» tien como respuestes teóricamente posibles les siguientes formes: caer, que ye común a toos dos dominios; caír, que ye occidental; cair, que ye oriental; cayer, que ye oriental; y quer, que ye axial. Puesto que la única respuesta n'El Pato ye cayer, la puntuación queda asina:

  • + Occidental – Oriental: 0
  • – Occidental + Oriental: 10
  • – Occidental – Oriental: 0
  • + Occidental + Oriental: 0

Otru exemplu. El fenómenu «Conservación del primer elementu tónicu d'un hiatu, frente al so zarramientu. Contactu de vocal palatar por cayida de nasal» tien como respuestes posibles: cadea, chea (occidental), frente a cadena, chena (oriental), y hai qu'amestar una solución cadía, chía, que ye esclusiva de la zona axial. Desque se recoyó n'El Pato cadía y chía, la puntuación resultante ye esta:

  • + Occidental – Oriental: 0
  • – Occidental + Oriental: 0
  • – Occidental – Oriental: 10
  • + Occidental + Oriental: 0

Otru exemplu. El fenómenu «Resultaos de la secuencia [kwá-] tónica + nasal: caltenimientu de [wa] frente a l'alteració por perda de [w] o por monoptongación» tien como respuestes posibles: cánto y cándo, que son occidentales; cuánto y cuándo, que son comunes; y cónto y cóndo, que son axiales. N'El Pato recuéyense: cuándo ~ cóndo y cuánto ~ cónto. Polo tanto, la puntuación és:

  • + Occidental – Oriental: 0
  • – Occidental + Oriental: 0
  • – Occidental – Oriental: 5
  • + Occidental + Oriental: 5

Na taxonomización de los trazos intervienen diversos criterios de contraste ente dominios, onde xueguen factores como la estensión xeográfica, la continuidá xeográfica, la simetría o asimetría respecto de la zona axial, y otros.

En resultes, l'atles horiométricu permite cuantificar matemáticamente la proporción de trazos occidentales, orientales, axiales y comunes que caractericen la fala de caún de los puntos encuestaos. L'aplicación CartoDial permite dos maneres de representación:

  • a) Xenerando un mapa onde s'axunta en cada puntu d'encuesta un diagrama circular o de tarta, indicando les proporciones de trazos occidentales, orientales, axiales y comunes;
  • b) Xenerando un mapa coropletu, ye dicir, un mapa saturáu de polígonos de Thiessen, establecíos según la xeometría de Voronoi & Delaunay. Nesti tipu de mapa, a cada puntu d'encuesta correspuénde-y un polígonu. Les proporciones de trazos occidentales y orientales queden representaes nuna una gama de colores en polaridá binaria «caliente - frío».