Característiques del proyectu ETLEN

Qué ye l'ETLEN

L'ETLEN (Estudiu de la Transición Llingüística na Zona Eo-Navia, Asturies) ye un proyectu d'investigación dialectográfica, horiométrica y dialectométrica de la frontera ente los dominios llingüísticos gallego-portugués y asturlleonés na faza más occidental d'Asturies.

Fontes d'información llingüística

A diferencia d'otros proyectos dialectométricos, qu'obtienen los datos d'atles llingüísticos fechos previamente por otros dialectólogos, el proyectu ETLEN obtién los datos d'un Cuestionariu concebíu a costa fecha pa la investigación.

El Cuestionariu del ETLEN

El Cuestionariu del ETLEN ta formáu por más de 532 fenómenos llingüísticos; caún d'ellos da pie a una distinción dialectal según dominios llingüísticos. Por exemplu, «Conservación de les vocales /ε/ y /ɔ/ tóniques, frente a la so diptongación». Cada fenómenu contién un númberu variable de preguntes, que pue oscilar ente una y venti. Por exemplu, al fenómenu anterior correspuénden-y doce preguntes, referíes a los resultaos evolutivos de les formes llatines tĕrram, fĕrrum, uĕtŭlum, pĕtram, nĕptum, fĕstam, cŏrpus, pŏrtam, nŏuum, mŏrtuum, fŏlia y hŏrtum. Pel so llau, los 532 fenómenos distribúinse en 3 bloques:

  • Fonética y fonoloxía, 150 fenómenos.
  • Morfosintaxis nominal, 241 fenómenos.
  • Morfosintaxis verbal, 141 fenómenos.

El proyectu ETLEN nun tien contemplao, de mano, los trazos de mena léxica, que planteen problemes específicos non abordables nesti momentu.

Los informantes

En cada puntu xeográficu encuestóse un únicu informante. Siguiéronse criterios perconocíos na dialectoloxía tradicional: persona de más de 65 años, nacida en llugar, residente nelli tola vida o gran parte d'ella, ensin munches salíes fuera la comarca, ensin un gran nivel d'instrucción, con bones condiciones mentales y con bona verbalización y pronunciación. Considérase válidu'l criteriu de qu'un informante, si ta bien escoyíu, representa n'abondo la fala del llugar.

La encuestación

Les xeres d'encuestación lleváronse a cabu na casa del encuestáu. La encuestación de cada informante duró ente 6 y 10 hores, y por eso tuvo que se facer en delles sesiones. Toles encuestes quedaron grabaes dixitalmente. Toles encuestes se sometieron a diverses escuches, lo que motivó nueves visites a los informantes pa certificar datos y llograr otros.

Criterios na fechura del Cuestionariu del ETLEN

Criteriu diferencial. Preténdese que los fenómenos representen trazos diferenciales ente'l diasistema gallego-portugués y l'asturlleonés
Criteriu analíticu. En beneficiu d'una mayor precisión, procura asignase a fenómenos diferentes lo que, a pesar de les apariencies, podría clasificase como variantes d'un solu fenómenu.
Criteriu de non redundancia. Trátase de nun repetir o contar el mesmu fenómenu n'entraes diferentes: por exemplu, nun considerar un mesmu trazu como fónicu y como gramatical, apaeciendo inxustificadamente en dos fenómenos. D'esta manera, nun hai nenguna entrada pa les formes de posesivu gall. noso, voso / ast. nuesu, vuesu, puesto que'l trazu diferencial en realidá nun ye gramatical, sinón fónicu, y yá de mano se contempla nel fenómenu correspondiente a la conservación o diptongación de les vocales llatino-vulgares /ε/, /ɔ/.
Criteriu de la equiparación de trazos (non ponderación). L'ETLEN parte del principiu de nun dar diferente valor a caún de los trazos diferenciales contemplaos. Nun contamos güei con un aparatu matemático-estadísticu amañosu que nos permita establecer una ponderación oxetiva, y por eso pensamos que toa ponderación sería agora impresionística y intuitiva.
Criteriu glotolóxicu. L'ETLEN garra como principiu básicu la utilización de criterios estrictamente llingüíticos (glotolóxicos), refugando factores de tipu cultural, sociolóxicu o políticu.

Zona xeográfica estudiada: l'Eo-Navia

Los puntos d'encuesta son 40, y siguen una distribución más o menos homoxénea en mapa, tanto del puntu de vista puramente xeográficu como alministrativu (conceyos). Tamién se tuvo en cuenta'l trazáu de les principales isogloses conocíes. Los puntos d'encuesta del ETLEN son los siguientes (indícase nome de la población, nome de la parroquia a que pertenez ente paréntesis, y xebráu por coma, el nome del conceyu):

  • Zona principal del Eo-Navia (Asturies): Zreixido (A Veiga), A Veiga; Corondeño (Berducedo), Ayande; El Rebollu (Santa Colomba), Ayande; San Salvador (San Salvador), Ayande; Armal (Bual), Bual; El Valín (Piñeira), Castripol; Os Niseiros (Balmonte), Castripol; Vivedro (Trelles), Cuaña; El Pato (A Ronda), Eilao; Navedo (Sarzol), Eilao; San Xuyán (Villalmarzo), El Franco; Castro (Grandas), Grandas; El Vau (A Estierna), Ibias; Fanduvila (Tormaleo), Ibias; Valdeferreiros (Os Coutos), Ibias; Vilamayor (Cecos), Ibias; El Monte (Anlleo), Navia; Pezós (Pezós), Pezós; Labiaróu (Labiaróu), Samartín d’Ozcos; O Chao (San Tiso), San Tiso d’Abres; Teixeira (Santalla), Santalla d’Ozcos; Mántaras (Tapia), Tapia; A Garda (Taramunde), Taramunde; A Ponte (Penacova), Vilanova d’Ozcos; Berbegueira (Villayón), Villayón; Oneta (Oneta), Villayón; Poxos (Ponticella), Villayón.
  • Faza limítrofe del asturianu occidental (Asturies): Prada (Vil.lagrufe), Ayande; Monesteriu (Veigal.lagar), Cangas del Narcea; El Rebul.lal (Degaña), Degaña; Bárzana (Vil.lapedre), Navia; Bul.lacente (Rel.lanos), Tinéu; Riumayor (Outur), Valdés; L.landelfornu (Parl.leiru), Villayón.
  • Faza limítrofe del gallegu oriental (província de Lugo, Galícia): O Pando (Cereixido), A Fonsagrada; Cerdeiral (Neipín), A Pontenova; Murias do Camín (Ribón), Navia de Suarna; Negueira (Negueira), Negueira; O Rato (A Devesa), Ribadeo; A Vilapena (Vidal), Trabada.

Los tres atles del ETLEN

Atles dialectográficu de l'Eo-Navia [programa CartoDial]

Trátase d'un atles dialectal clásicu. Nél la unidá de consulta ye la pregunta-respuesta del cuestionariu. El programa CartoDial (Cartografía Dialectal), creáu y rexistráu n'andecha cola Escuela Universitaria d'Informática de Xixón, permite facer consultes tomando como base los puntos d'encuesta o bien les respuestes a les diferentes preguntes. Los resultaos de les consultes puen visualizase en testu o cartográficamente. Asina, CartoDial ye a xenerar unos 2.000 mapes distintos, correspondientes a les distintes preguntes qu'apaecen a lo llargo de los 532 fenómenos del cuestionariu. Les respuestes apaecen na ortografía usual, anque nes respuestes del bloque fonético-fonolóxicu trescríbese n'Alfabetu Fonéticu Internacional el segmentu oxetu d'estudiu; por exemplu, t['ε]rra.

Atles dialectométricu diferencial o de la Escuela Dialectométrica de Salzburgo [programa VDM]

Esti tipu d'atles xenérase por aciu del programaVDM (Visual DialectoMetry), desarrolláu na Universidá de Salzburgo (Austria) pol equipu del profesor Hans Goebl. Les consultes nesti casu consisten en verificar cuáles son les asemeyances y diferencies, en trazos llingüísticos, ente caún de los 40 puntos d'encuesta. Tales asemeyances y diferencies apaecen como valores estadísticos, depués de convertir los diversos trazos llingüísticos diferenciales en valores matemáticos. La representación cartográfica ye un mapa de polígonos o coropletu, onde los diversos valores de la escala d'asemeyanza / diferencia represéntase nuna gama de colores «caliente – frío». D'otra manera, el programa VDM ye a xenerar agrupaciones dialectales formaes por xerarquización de trazos diferenciales, tomando la forma d'un árbol xenealóxicu (dendrograma o árbol de Ward), d'au resulta una clasificación o agrupación dialectal obtenida por aciu de procedimientos matemático-estadísticos.

 

Atles horiométricu o dialectométricu de frontera [programa CartoDial]

Nesti atles, la unidá de consulta ye caún de los fenómenos del cuestionariu. Cada fenómenu contién trazos llingüísticos diferenciales con respuestes que permiten adscribise al dominiu gallego-portugués, al dominiu asturlleonés y, en bien pocos de casos, a la zona Eo-Navia, si'l fenómenu en cuestión ye esclusivu d'ella. Con cuenta d'evitar denominaciones de mena étnica, l'ETLEN valse de les espresiones dominiu occidental, dominiu oriental y zona axial, respectivamente. Asina, dau un fenómenu nun puntu d'encuesta determináu, a les sos respuestes asígnase-yos una taxonomía (o adscripción xeotipolóxica) d'acuerdu con esti esquema:

  • + Occidental – Oriental [= fenómenu clasificáu como gallego-portugués]
  • – Occidental + Oriental [=fenómenu clasificáu como asturlleonés]
  • – Occidental – Oriental [=fenómenu clasificáu como axial]
  • + Occidental + Oriental [=fenómenu común a dambos dominios]

Nesti esquema asígnase una puntuación a cada ítem; la suma de tolos ítems tien que ser de 100 puntos.

Na taxonomización de los trazos intervienen diversos criterios de contraste ente dominios, onde xueguen factores como la estensión xeográfica, la continuidá xeográfica, la simetría o asimetría respecto de la zona axial, y otros.

En resultes, l'atles horiométricu permite cuantificar matemáticamente la proporción de trazos occidentales, orientales, axiales y comunes que caractericen la fala de caún de los puntos encuestaos. L'aplicación CartoDial permite dos maneres de representación:

  • a) Xenerando un mapa onde s'axunta en cada puntu d'encuesta un diagrama circular o de tarta, indicando les proporciones de trazos occidentales, orientales, axiales y comunes;
  • b) Xenerando un mapa coropletu, ye dicir, un mapa saturáu de polígonos de Thiessen, establecíos según la xeometría de Voronoi & Delaunay. Nesti tipu de mapa, a cada puntu d'encuesta correspuénde-y un polígonu. Les proporciones de trazos occidentales y orientales queden representaes nuna gama de colores en polaridá binaria «caliente - frío».