Metodoloxía

El proyectu AMPER propónse la descripción xeneral de los rasgos prosódicos de les llingües romániques y de les sos variedaes dialectales col fin d’establecer patrones entonativos per zones de manera que la so comparanza sía granible. Esto esixe establecer una metodoloxía de trabayu común a tolos grupos relativa a informantes, corpus, procedimientu d’análisis y organización de los datos resultantes.

1 – Los informantes han ser muyeres y homes con una edá ente los 25 y los 50 años, ensin estudios superiores, nacíos y residentes nel llugar onde se realiza la encuesta.

2 – Ún de los mayores problemes que plantega la realización d’un estudiu fonéticu de la entonación ye la elección del corpus de trabayu. Pa qu’esti sía espontaneu y al empar compatible coles necesidaes del investigador, diseñáronse trés tipos de corpus: ún de frases ad hoc, otru corpus inducíu y un terceru conocíu como ‘xera de mapa’.

Pal corpus ad hoc preparóse una serie de frases nes que se controlaron variables fonétiques y sintáctiques. Les frases compuestes por un suxetu (con y ensin espansión) + verbu + oxetu (con y ensin espansión) tán permediaes en cuanto al númberu de sílabes y a la distribución acentual en palabres agudes, llanes y esdrúxules (pa les llingües que presenten esta variación acentual, obviamente). La combinación de les distintes variables da como resultáu 63 enunciaos que cada informante emite tanto en modalidá asertiva como interrogativa absoluta, 126 enunciaos en total. Esti corpus, presentáu n’orde aleatoriu, tienen de repitilo los informantes tres vegaes, lo qu’ufierta un total de 378 enunciaos emitíos por cada informante pal so análisis.

El corpus inducíu consiste na recreación d’una situación na que se lleva discretamente al informante a formular ciertes preguntes y realizar delles afirmaciones.

A lo último, la xera de mapa consiste en presentar al informante’l mapa d’un llugar imaxinariu —con topónimos dacuando inventaos acordies colos requerimientos fonéticos—, asemeyáu, anque non idénticu, al del encuestador. Como estímulu pa la conversación puen formulase preguntes hasta dar con una supuesta ayalga escondida en dalgún puntu del mapa y los pericuetos p’aportar a ella.

3 – En realizando les grabaciones, acométense les siguientes rutines d’análisis acústicu: de primeres estrémase la señal continua n’enunciaos individuales, etiquétense siguiendo un modelu xeneralizáu onde queda reflexada la zona, l’informante y el tipu de frase —atendiendo a la estructura acentual y a la modalidá—. P’acabar, realízase l’análisis consistente en segmentar les vocales de cada enunciáu de les que s’estraen los valores de duración, intensidá y frecuencia fundamental. Esta información recuéyese automáticamente en ficheros a partir de los que se pue afayar medies, establecer comparances, xenerar gráficos coles curves d’entonación y histogrames colos valores de duración y intensidá. El mesmu programa ta provistu d’un protocolu de resíntesis del que los archivos resultantes son aptos pa la realización de test perceptivos.

L’análisis instrumental de la prosodia fízose col programa desenvueltu por Antonio Romano (AMPER-fox y AMPER-dat) n’entornu Matlab, remocicáu n’AMPER 2006 pol grupu AMPER-Astur col envís d’entainar los protocolos de segmentación, estilización y organización de los resultaos.