Dictadoloxía Tópica d’Asturies (DTA)
El proyectu «Dictadoloxía Tópica d’Asturies» (DTA), dirixíu por Luis Casteleiro Oliveros y Ramón d’Andrés Díaz, tien como oxetivu ofrecer los «dictaos tópicos» d’Asturies, esto ye, los xentilicios, nomatos, cantares y refranes referíos a los topónimos y habitantes de los distintos llugares y pueblos d’Asturies. Pasu ente pasu, na base de datos van dixitalizándose y catalogándose los datos recoyíos de diverses fontes d’investigación.
El proyectu DTA contién los materiales asturianos del Diccionario geográfico popular de España (DGPE), de Camilo José Cela. De fechu, el proyectu DTA nació cola dixitalización d’esos materiales.
El Diccionario geográfico popular de España (DGPE) de Camilo José Cela
Nel deceniu de los años 60, l’escritor Camilo José Cela concibió’l proyectu d’un Diccionario geográfico popular de España (DGPE), onde diba atropar los «dictados tópicos», quier dicise, los xentilicios, nomatos, cantares y refranes referíos a los topónimos y habitantes de los distintos llugares y pueblos d’España.
Cuntaba fornir la so obra con dos menes de materiales:
(a) datos yá espublizaos n’otres obres; y
(b) datos llograos en trabayu de campu.
Al envís de lo segundo, a comienzos de los años 70 solicitó la collaboración del serviciu nacional de Correos: a los carteros de toa España pidióse-yos que fixeren d’encuestadores, recoyendo datos de les distintes poblaciones y llugares onde exercíen la so actividá, acordies con un modelu de ficha común. Axuntáronse asina unes 30.000 fiches referíes a toa España. La mayor parte d’estos materiales quedaron inéditos; ente ellos, los referíos a Asturies, que se conserven na Fundación Pública Gallega «Camilo José Cela», n’Iria Flavia (provincia d’A Coruña). Estos materiales son los qu’agora ven la lluz nesta base datos pública.
En xunetu del 2012 la Fundación Pública Gallega «Camilo José Cela» y la Universidá d’Uviéu, al traviés del grupu d’investigación «Seminariu de Filoloxía Asturiana», firmaron un conveniu que tien como oxetivu la dixitalización, catalogación y publicación online de los materiales inéditos del DGPE referíos a Asturies.
Los trabayos, dirixíos por Luis Casteleiro Oliveros y Ramón d’Andrés Díaz, rematáronse en xineru del 2015 cola apertura d’esti portal d’accesu y consulta llibre.
Nel 2017 enánchase la base de datos pa recoyer «dictaos tópicos d’Asturies» de cualesquier fonte, convirtiéndose na web Dictadoloxía Tópica d’Asturies (DTA).