ETLEN ye la sigla d’Estudiu de la transición llingüística na zona Eo-Navia, Asturies, un proyectu d’investigación de la Universidá d’Uviéu que desembocó nel atles llingüísticu del mesmu nome, publicáu nel 2017. L’ETLEN ye una obra de xeografía llingüística centrada na faza más occidental del Principáu d’Asturies, onde s’atopa la frontera ente los dominios llingüísticos gallegoportugués y asturlleonés.
Esta zona, que de siempre tien merecío l’interés de los llingüistes y dialectólogos, correspuende a un complexu de fales llamaes en xunto gallego-asturianu, gallegu d’Asturies o eonaviegu. El gallego-asturianu ye básicamente un tipu de gallegu de transición al asturianu: anque participa de les característiques del gallegu y del asturianu, presenta una proporción de trazos llingüísticos de tipu gallegoportugués superior al de trazos de tipu asturlleonés, siendo qu’estos van aumentando según s’avanza d’occidente a oriente.
L’ETLEN ye’l primer atles específicu de la zona Eo-Navia. Ye’l primeru que, amás de los datos xeollingüísticos típicos d’esta mena d’obres, inclúi dos secciones de llingüística cuantitativa, qu’ayuden a conocer y tipificar la zona Eo-Navia con metodoloxíes estadístiques: la sección horiométrica y la sección dialectométrica.