Conteníu del atles ETLEN
L’atles ETLEN tien trés secciones bien definíes: dialectográfica, horiométrica y dialectométrica. La primera ye de triba descriptiva; la segunda y tercera son de triba cuantativa o estadística.
Sección dialectográfica
Tien l’aspectu d’un atles llingüísticu de fechura clásica. Fórmenla 531 mapes de la zona d’estudiu, onde se van conseñando, en cada llugar, les respuestes a otres tantes entrugues del cuestionariu (que correspuenden a 368 fenómenos llingüísticos). Clasifíquense d’acuerdu colos trés bloques del cuestionariu: bloque fonético-fonolóxicu, bloque morfosintácticu nominal y bloque morfosintáctivu verbal. Ye la sección más estensa del atles.
Sección horiométrica
Fórmenla 35 mapes con información estadístico. «Horiometría» ye un neoloxismu iguáu pol equipu d’investigación, que quier dicir «midimientu de la frontera llingüística». La horiometría básase na constatación de que la inmensa mayoría de los trazos llingüísticos recoyíos nes encuestes presenten una distribución xeográfica, respecto de los dominios llingüísticos limítrofes, que permiten clasificase como «occidentales», «orientales», «axiales» y «comunes». D’esti xeitu, la fala de cada llugar caracterízase por una proporción determinada de trazos de los cuatro tipos, que puede midise en porcentaxes. Finalmente, l’aspectu estadísticu de cada llugar permite apreciar el grau d’«occidentalidá», «orientalidá», «axialidá» y de trazos comunes que tien la fala de cada llugar. La información estadístico de la sección horiométrica preséntase en dos menes de mapes: los de diagrama circular (o «de quesu»), con cuatro sectores según los tipos mentaos; y los poligonales, con gradación cromático-estadística a partir de la referencia escoyida (occidental, oriental, axial, común).
Sección dialectométrica
Fórmenla 77 mapes tamién con información estadístico, pero d’otru tipu. La dialectometría ye un métodu d’análisis de la variación dialectal que consiste, básicamente, en tipificar los trazos llingüísticos de la fala de cada llugar, pa llueu con ellos midir les asemeyances y diferencies ente los diferentes llugares del territoriu estudiáu, aplicando diversos algoritmos y segmentaciones. Son variaes les operaciones estadístiques que se faen per aciu de la dialectometría, toes elles representables n’histogrames y mapes característicos: mapes sinópticos o d’asemeyanza (de puntu de referencia, integrales), mapes interpuntuales (isoglóticos, de rayos), mapes de correlaciones (ente dos corpus llingüísticos, ente asemeyanza llingüística y proximidá xeográfica) y mapes aglomerativos con métodos estadísticos diversos. L’ETLEN axústase a la dialectometría desarrollada na Universidá de Salzburgo (Austria) pol profesor Hans Goebl, una de les autoridaes nesta metodoloxía. Frente a la horiometría ―que centra’l so enfotu nel estudiu específicu d’una frontera llingüística―, la dialectometría nun estudia fronteres, sinón diferencies ente los llugares del mapa. Sin embargu, los datos de los análisis dialectométricos ufierten munchos nicios sobre la existencia d’una frontera llingüística.